Қазақстандағы медианың өзін өзі реттеу Қоғамдық комитетіне мүшелерді сайлау қорытындысы шықты

Қоғамдық комитеттің екінші құрамына барлығы 27 үміткер ұсынылды. Олардың 19-ы медиақауымдастықтан, сегізі Үкіметтік емес ұйым секторынан. Үміткерлерді ұсыну 2023 жылдың 6-26 маусым аралығында жүргізілді.

Үміткерлерге дауыс беру туралы хабарландыру 26 маусымда жарияланды, сайлау 27 маусымда басталып, 29 маусымда түнгі 12.00-де аяқталды.

Медианың өзін өзі реттеуі Қоғамдық комитетінің Ережесі бойынша Медиа тізімінен ең көп дауыс жинаған алты адам, ҮЕҰ тізімінен үш адам сайлануы тиіс.

Ереже бойынша, егер Комитет мүшелерінің бірі қандай да бір себеппен комитет құрамынан шығып қалса, тізімде көп дауыс жинаған келесі үміткер оның орнын баса алады. Немесе бірдей дауыс жинаған үміткерлер болса, олардың алфавит бойынша фамилиясы бірінші тұрған адамға басымдық беріледі. Бізде ондай сәйкестік екі жерде кездеседі: әр тізім бойынша бірден.

«Қазақстандық медиа желі/ KazMediaNetwork» қоғамдық бірлестігі комиссиясының (құрамы Лариса Павловна Нода, Бактыгуль Бурбаева и Жания Әбдібек ) шешімімен берілген дауысқа негіздей отырып, комитеттің жаңа құрамы мақұлданды:

• Жұлдыз Әбділда, "Ұлан"газеті бас редактордың орынбасары

• Диана Окремова, Құқықтық медиа орталық директоры

• Динара Калиева, «ҚР Президентінің телерадиокешені» КЕАҚ

• Анастасия Боловинцева, informburo.kz бас директор

• Олжас Мурзагалиев, «tengrinews.kz» бас редакторы

• Қалима Тәжіқұл, медиаэксперт, медиатренер

• Нұрлыбек Рахманов, "Медиа білім"қорының директоры

• Гульмира Биржанова, Құқықтық медиа орталық, медиа заңгер

• Есенгүл Кәпқызы, оқытушы, «Мінбер» қоры, бас директоры

Қазақстандағы медианың өзін өзі реттеу Қоғамдық комитетінің құрылтайшылары атынан әл-Фараби атындағы ҚазҰУ оқытушысы Лариса Нода сөз сөйледі. Ол этиканың журналистикадағы маңызына тоқтала отырып, комитеттің жаңа құрамына «медианы этиканың биік шыңына көтере алатын адамдардың» енгеніне қуанатындығын жеткізді.

Жаңа құрамды белгілі медиа заңгер Ольга Диденко құттықтап сөз сөйледі. Оның айтуынша, соңғы кездері қоғамда этиканы сақтайтын медиаға деген сұраныс артып отырған көрінеді.

«Бұл сайлауға қатысқан әрбір үміткерге рахмет айтамыз. Сондай-ақ, медиа этикаға негізделген кәсіби журналистиканың белсенді қолдаушысы болуға шақырамыз! Жаңа құрамның Медианың базалық принциптеріне және халықаралық журналистік этика кодекстеріне сүйене отырып, медиа этикаға қайшы мәселелерді әшкерелеуге дайын болуына тілектестік білдіреміз. Ең бастысы, бірлесе отырып ұсыныстарды қабылдау, оны қоғам назарына жеткізе білу. Медиа этикаға қайшы әрекеттерді азайтуға үлес қоса отырып, Қазақстан журналистикасын қайтадан сапалы журналистикаға айналдыру. Біз бірге журналистер арасында және қоғамда этика нормалары туралы айтуды жалғастыра береміз», - деп атап өтті «Қазақстандық медиа желі/ KazMediaNetwork» қоғамдық бірлестігінің атқарушы директоры Бактыгуль Бурбаева.

Хикая:
Естеріңізге сала кетейік, медианың өзін-өзі реттеуі жөніндегі қоғамдық комитеті Қазақстанда алғаш рет құрылды.

Ол Қазақстан медиасының негізгі принциптерінде көрсетілген кәсіби этика талаптарын бұзғаны үшін сынға ұшыраған және қоғамдық резонансқа ие болған журналистік материалдарға қатысты шағымдарды қарастырады.

Мақсат - кәсіби диалог құратын және осындай дауларды қарайтын алаң құру. Комитеттің шешімдері ұсынымдық сипатқа ие, заңдық күші болмайды. Алайда медианың өзін-өзі реттеуі жөніндегі қоғамдық комитет медиакеңістіктегі қақтығыстарды сотқа жеткізбей шешуге мүмкіндік беретін инстанция болады.

Қоғамдық Комитет құрамына ашық дауыс беру арқылы 9 адам сайланды, олардың басым көпшілігі медиасарапшылар, БАҚ редакторлары. Сондай-ақ, комитетке ақпараттық дауларды шешуде тәжірибесі мол заңгерлер, авторлық құқық жөніндегі мамандар кірді.

Бірінші отырыста қоғамдық комитеттің басшылары сайланды. Комитет төрағасы болып белгілі журналист, "Ұлан" газетінің бас редакторы, медиатренер Жұлдыз Әбділдә тағайындалды. Комитеттің тоғыз мүшесінің алтауы оның кандидатурасын қолдап дауыс берді. Комитет төрағасының орынбасары ретінде көпшіліктің дауыс беруімен қазақстандық медиа продюсер және тренер Ержан Сүлейменов таңдалды.

Ақпараттық дауларды қараудың нәтижесінде қоғамдық комитет тиісті шешім қабылдайды, оған комитет төрағасы қол қояды. Шешімді қабылданған деп санау үшін Комитет мүшелерінің жартысынан көбі оған дауыс беруі керек, дауыстар тең түскен жағдайда Комитет төрағасының даусы шешуші болады.

Қоғамдық комитетке медиақауымдастық өкілдерінің онлайн дауыс беруі арқылы таңдалған 9 адам кірді. Олар: "Ұлан" газетінің бас редакторы Жұлдыз Әбділдә, "Новое Телевидение" телеарнасы мен "Жаңа FМ" радиосының бас редакторы Руслан Никонович, медиапродюсер және тренер Ержан Сүлейменов, Ш.Шаяхметов атындағы "Тіл-Қазына" қазақ мәдени орталығының қоғаммен байланыс бөлімінің бұрынғы басшысы Мейрамхан Жапек, SDU аға оқытушысы, медиа зерттеуші Оразай Қыдырбаев, "Время" газетінің күнделікті шығарылымы редакторының орынбасары Руслан Бахтигареев, құқықтық медиа орталығының директоры Диана Окремова, авторлық құқық жөніндегі сарапшы Темірлан Төлегенов, ақпараттық дауларды шешуде тәжірибесі бар, "ҚР Судьялар Одағы" қоғамдық бірлестігі ұсынған отставкадағы судья Бағлан Мақұлбеков.